✅ Mamlakatimiz Prezidenti joriy yilning 1-2 may kunlari viloyatimizga tashrifi chog‘ida ko‘p yillar davomida el-yurt uchun fidokorona xizmat qilgan davlat va jamoat arbobi Shakarjon Xo‘janiyozova tavalludining 70 yilligini keng nishonlash hamda xotirasini abadiylashtirish bo‘yicha topshiriq bergan edi. Bugun 12 iyun – Shakarjon Xo‘janiyozova tavallud topgan sanada viloyatimizda yurtimizning ardoqli farzandi xotirasiga bag‘ishlangan qator tadbirlar bo‘lib o‘tdi.

✅ Tadbir ishtirokchilari dastlab Bog‘ot tumanidagi “Tolli bobo” qabristonida Shakarjon Xo‘janiyozovaning qabrini ziyorat etib, Qur’on tilovat qildilar. Shundan keyin chinakam o‘zbek ayoli timsoli bo‘lgan, fidoyi va matonatli rahbar Shakarjon Xo‘janiyozova yashab o‘tgan xonadonda uy muzeyi ochildi. Muzeydan Shakarjon Yusupovnaning hayoti va faoliyatiga oid eksponatlar o‘rin olgan.

✅ Shuningdek, Bog‘ot tumani asosiy ko‘chalaridan biriga va tuman sport maktabiga qarashli gimnastika markaziga Shakarjon Xo‘janiyozova nomini berish bo‘yicha qaror loyihasi ishlab chiqildi. Hurmatli Prezidentimizning topshirig‘iga asosan, viloyatdagi faol xotin-qizlar o‘rtasida Shakarjon Xo‘janiyozova nomidagi rahbar ayollar tanlovini o‘tkazish, g‘oliblarni davlat idoralari uchun rahbar kadrlar zahirasiga tavsiya etish mexanizmi ishlab chiqildi va mazkur tanlovni yuqori saviyada tashkil etish bo‘yicha jarayonlar davom etmoqda.

✅ Xotira tadbirlarining asosiy qismi Urganch shahridagi viloyat musiqali drama teatrida o‘tkazildi. Unda O‘zbekiston Respublikasi Bosh vaziri o‘rinbosari Zulayho Mahkamova, viloyat hokimi Jo‘rabek Raximov qatnashib, Shakarjon Yusupovnaning Vatan va xalq oldidagi ulkan xizmatlari haqida to‘xtaldilar. Tadbirda Shakarjon Xo‘janiyozovaning serqirra faoliyati aks ettirilgan sahna ko‘rinishlari, rasmlar ko‘rgazmasi namoyish etildi. Faol ishtirokchilar turli nominatsiyalar bo‘yicha viloyat hokimining tashakkurnomasi bilan taqdirlandilar